《ERROR自肥企画》，我只係睇咗兩集，第一集幾過癮，惡搞EVA，但有啲不知所云嘅感覺，但尋晚嗰集，堅深刻，直接會令我繼續追落去。
-
綜藝節目，目的就梗係為觀眾帶嚟娛樂，但要娛樂到見多識廣、精甩尾嘅香港觀眾，唔容易。
-
因為只係睇咗第一集嘅關係，尋晚一跳就跳到去ERROR成員保錡無尼啦更要走去學搖搖，喺一個月嘅時間之內學五招難度頗高嘅搖搖招式。然後鏡頭一轉，已經係一個月之後。
-
而測試嘅規則好簡單，保錡會有五個機會去做每一招，當時自以為聰明嘅我，已經[心中有數]。
-
如果有留意開VIU或者娛樂新聞嘅香港人，應該都會知道保錡因為負面新聞瀕臨雪藏邊緣嘅呢件事。《自肥企画》喺呢個時候推出，啱啱好就可以係一個黃金嘅洗底機會，透過乜鬼嘢重新做人、改過自新、洗心革面去挽回返觀眾嘅好感。前兩集我無睇，但我見到尋晚佢玩搖搖嘅當下，會唔會又係[洗底]嘅好機會呢?點知......
-
保錡竟然係五關入面嘅第2關，嗰招唔知咩智能旋風定乜嘢，就直接5次嘗試失敗出局 ! 對好多觀眾嚟講，可能只係一笑置之，但我就睇到，ERROR呢個節目嘅[真]。
-
比一個月時間你，練到就練到，練唔到就出醜，喺正常[扮]係真人show嘅節目之下，結果通常得兩個 :1. 主角一額汗但完成到試煉，膠嘢認真做，搏得觀眾嘅尊敬 ; 2. 敗不可恥，測試雖然失敗，但係喺過程中充分展現出堅毅同努力，同樣得到觀眾嘅好感。但最終，竟然殺出呢個我意料不及嘅結果。
-
就係呢份[真]，昇華咗成個綜藝節目，玩搖搖之後，係節目各自整蠱Error四子，四件事本身都好無聊，但因為我相信佢哋係堅係被整蠱，所以好睇。
-
其實呢啲綜藝節目，賣點從來都應該係[真]，可惜喺不斷發展所謂發展[成熟]之下，又會回歸返去[劇本]，有好多顧慮。我少睇綜藝，可能Viu嘅節目不嬲都係咁，但《ERROR自肥企画》的確係我耳目一新嘅體驗，記錄低自己少少嘅睇法。
Search